കെ കേളപ്പന്‍
കേരള ഗാന്ധി എന്നറിയപ്പെടുന്ന കെ കേളപ്പന്റെ
നൂറ്റിപ്പതിമൂന്നാം ജന്മവാര്‍ഷികം നാളെ.
കൊയിലാണ്ടിക്കു വടക്കുള്ള മുടാടിയിലെ
മുച്ചുകുന്ന് ഗ്രാമത്തില്‍ 1890 സെപ്തംബര്‍ 9ന്
ജനിച്ച കേളപ്പന്‍ നായരാണ്, കേളപ്പനും, കേളപ്പജിയും, കേരളഗാന്ധിയുയായി വളര്‍ന്നത്.
മാതൃഭൂമിയുടെ പത്രാധിപര്‍, കെ പി സി യുടെ
അദ്ധ്യക്ഷന്‍, മലബാര്‍ ജില്ലാ ബോര്‍ഡിന്‍റെ പ്രസിഡന്‍റ് ,
നായര്‍ സര്‍വീസ് സൊസൈറ്റിയുടെ ആദ്യ പ്രസിഡന്‍റ്
തുടങ്ങി പല നിലകളിലും പ്രവര്‍ത്തിച്ചിട്ടുണ്ട്.
ഏങ്കിലും ഗുരുവായൂര്‍, വൈക്കം എന്നിവിടങ്ങളിലെ
സത്യഗ്രഹങ്ങളുടെ പേരിലാണ് കേളപ്പജി പ്രശസ്തനായത്, ഗുരുവായൂര്‍ ക്ഷേത്രസന്നിധിയില്‍ 1932 സെപ്തംബറില്‍
കേളപ്പന്‍ ആരംഭിച്ച നിരാഹാര സത്യാഗ്രഹം
ജനങ്ങളെയാകെ ഇളക്കിമറിച്ചു. എല്ലാ ജാതി
വിഭാഗങ്ങള്‍ക്കും ക്ഷേത്രത്തില്‍ പ്രവേശനം അനുവദിക്കുന്നതിനായിരുന്നു സമരം.
പത്തു ദിവസം നീണ്ടു നിന്ന നിരാഹാര സമരത്തോട്
അനുബന്ധിച്ചു നടന്ന പ്രചാരണവും പ്രക്ഷോഭവും
മലബാറില്‍ പുതിയൊരു ജനകീയ മുന്നേറ്റത്തിനു
വഴിതുറന്നു.
അതിനുമുന്പ് 1924 മാര്‍ച്ച് മുതല്‍ വൈക്കത്ത്,
പിന്നോക്ക സമുദായക്കാര്‍ക്ക് വഴി നടക്കാനുള്ള
സ്വാതന്ത്ര്യത്തിനു വേണ്ടി നടന്ന സത്യഗ്രഹ സമരത്തിലും
കേളപ്പന്‍ നേതൃത്വപരമായ പങ്കുവഹിച്ചു. ജയില്‍വാസമനുഭവിച്ചിരുന്നു. ഗാന്ധിജിയുടെ
ആദര്‍ശങ്ങളും ജീവിതശൈലിയുമൊക്കെ സ്വജീവിതത്തിലും കര്‍മ്മങ്ങളിലും പ്രതിഫലിപ്പിച്ച ആ സേവകനെ ജനങ്ങള്‍
കേരള ഗാന്ധി എന്നു വിളിച്ചിരുന്നു.
കേരളത്തിന്‍റെ സ്വാതന്ത്ര്യസമര ചരിത്രത്തില്‍ എന്നും
മായാത്ത മുദ്രപതിച്ച സേനാനിയായിരുന്നു കെ.കേളപ്പന്‍.
അധഃകൃത വിഭാഗങ്ങളെ ഉദ്ധരിക്കുന്നതിനു വേണ്ടി
അദ്ദേഹം നടത്തിയ ത്യാഗോജ്വലമായ പോരാട്ടങ്ങളുടെ
ചരിത്രം മനുഷ്യസ്നേഹികളെ എക്കലത്തും ആവേശം
കൊള്ളിക്കാന്‍ പോന്നതാണ്.
മഹാത്മാഗാന്ധിയുടെ പരിപാടിയനുസരിച്ച്
ഇന്ത്യയിലുടനീളം നടന്ന ഉപ്പുസത്യഗ്രഹത്തിനു കേരളത്തില്‍
നേതൃത്വം നല്‍കിയതു കേളപ്പനാണ്.
1931 ഏപ്രില്‍ 13 ന് കോഴിക്കോട്ടു നിന്ന് കാല്‍നടയായി
പുറപ്പെട്ട സന്നദ്ധഭട സംഘം പയ്യന്നൂര്‍ കടല്‍പുറത്തുവച്ച്
ഏപ്രില്‍ 23 നാണ് ഉപ്പുനിയമം ലംഘിച്ചത്. ഇതോടനുബന്ധിച്ചും കേളപ്പനു ജയില്‍ശിക്ഷ ലഭിച്ചു. മലബാർ ലഹളയുടെ
കാലത്ത് ഒരുകൂട്ടം വിപ്ലവകാരികൾ പൊന്നാനി ഖജനാവ് കൊള്ളയടിക്കുവാനെത്തി. ഇവരെ അവരുടെ തെറ്റ് പറഞ്ഞുമനസ്സിലാക്കി തിരിച്ചയക്കുവാൻ
കേളപ്പനു സാധിച്ചു.
മദ്രാസില്‍ നിന്ന് ബിരുദമെടുത്ത അദ്ദേഹം അദ്ധ്യാപകനായി ജീവിതമാരംഭിച്ചു. പൊന്നാനി, കോഴിക്കോട്,
ചങ്ങനാശ്ശേരി എന്നിവിടങ്ങളില്‍ ജോലി ചെയ്തു.
നായര്‍ സര്‍വീസ് സൊസൈറ്റി രൂപവല്‍ക്കരിക്കുന്നതിന്
മന്നത്തു പത്മനാഭനോടൊപ്പം മുന്‍കൈയെടുത്ത കേളപ്പന്‍ നായരയിരുന്നു ആ സംഘടനയുടെ ആദ്യത്തെ അദ്ധ്യക്ഷന്‍.
ക്ഷേത്രസംരക്ഷണ സമിതി രൂപവത്കരിക്കാന്‍
മുന്‍കൈ എടുത്ത കേളപ്പന്‍ ആദ്യകാലത്ത് അതിന്‍റെ
അദ്ധ്യക്ഷനായും സേവനമനുഷ്ഠിച്ച. പൊന്നാനി താലൂക്കിലെ
തവന്നൂര്‍ റൂറല്‍ ഇന്സ്റ്റിറ്റ്യൂട്ട് സ്ഥാപിച്ചത്
കേളപ്പനായിരുന്നു.
കെ.പി.സി.സി. പ്രസിഡന്‍റായി ദീര്‍ഘകാലം പ്രവര്‍ത്തിച്ച
കേളപ്പജി 1951ല്‍ കോണ്‍ഗ്രസില്‍ നിന്നു രാജിവച്ചു.
ആചാര്യ കൃപലാനി നേതൃത്വം നല്ക്കിയ
കിസാന്‍ മസ്ദൂര്‍ പ്രജാപാര്‍ട്ടിയില്‍ ചേര്‍ന്നു.
ആ പാര്‍ട്ടി ടിക്കറ്റിലാണ്അദ്ദേഹം പൊന്നാനിയില്‍
നിന്ന് ലോക്സഭാംഗമായത്. പിന്നീട് രാഷ്ട്രീയം ഉപേക്ഷിച്ചു.
സര്‍വോദയ പ്രവര്‍ത്തകനായി.
രാഷ്ട്രത്തിനുവേണ്ടി സമർപ്പിച്ച നിസ്സ്വാർത്ഥമായ
ഒരു ജീവിതമായിരുന്നു കേളപ്പന്റേത്. ഒരിക്കലും
പദവിക്കോ അധികാരത്തിനോ വേണ്ടി കേളപ്പൻ
ആഗ്രഹിച്ചിരുന്നില്ല. കോഴിക്കോട്ടെ ഗാന്ധി ആശ്രമത്തില്‍
വെച്ച് 1971 ഒക്റ്റോബര്‍ ആറിന് ആ ധീര ദേശാഭിമാനി
അന്തരിച്ചു.
No comments:
Post a Comment