നാളെ പി ഭാസ്കരന്‍ മാഷിന്റെ അഞ്ചാം ചരമ വാര്‍ഷികം....
=======================================
(1924 മെയ് 21- 2007 ഫെബ്രുവരി 25).
മലായാള സിനിമരംഗത്തെ ബഹുമുഖ പ്രതിഭയായിരുന്ന
പി ഭാസ്കരന്‍ മാഷ്‌ അന്തരിച്ചിട്ട് നാളെ അഞ്ചുവര്‍ഷം .
മലയാള സിനിമാ ലോകത്തിനു പകരം വയ്ക്കാന്‍ ആളില്ലാത്ത വ്യക്തിത്വത്തിനുടമയായിരുന്നു ഭാസ്കരന്‍ മാഷ്‌.
പിതാവ് നന്തിലത്ത് പത്മനാഭമേനോൻ, ഭാര്യ ശാരദ,
മക്കൾ രാജീവൻ, വിജയൻ, അജിതൻ, രാധിക.
ഗാനരചയിതാവ്, ചലച്ചിത്ര സംവിധായകൻ, ചലച്ചിത്ര നടൻ,
ആകാശവാണി പ്രൊഡ്യൂസർ, സ്വാതന്ത്ര്യ സമര സേനാനി,
ആദ്യകാല കമ്യൂണിസ്റ്റ് പ്രവർത്തകൻ, പത്രപ്രവർത്തകൻ
എന്നീ കുപ്പായങ്ങളെല്ലാം അണിഞ്ഞിരുന്നു.
ഏഷ്യാനെറ്റിന്റെ സ്ഥാപക ചെയർമാനായും,
കെ.എഫ്.ഡി.സിയുടെ ചെയർമാനായും,
ദേശാഭിമാനി ദിനപത്രത്തിന്റെ പത്രാധിപരായും,
ജയകേരളം മാസിക, ദീപിക വാരിക എന്നിവയുടെ
പത്രാധിപ സമിതി അംഗമായും സേവനമനുഷ്ഠിച്ചിട്ടുണ്ട്.
വിദ്യാഭ്യാസകാലത്ത് പുരോഗമന പ്രസ്ഥാനങ്ങളോട്
ബന്ധപ്പെട്ടിരുന്ന ഭാസ്കരൻ 1942-ൽ ക്വിറ്റിന്ത്യാ സമരത്തോടനുബന്ധിച്ച്
ജയിൽ വാസം വരിക്കുകയുണ്ടായി. പിന്നീട്
കമ്യൂണിസ്റ്റ് പ്രസ്ഥാനങ്ങളുടെ സഹയാത്രികനായി.
അക്കാലത്ത് ഒളിവിലും തടവിലും കഴിഞ്ഞിട്ടുണ്ട്.
വയലാർ വെടിവെപ്പിനെ കുറിച്ച് അദ്ദേഹം രചിച്ച
"വയലാർ ഗർജ്ജിക്കുന്നു " എന്ന സമാഹാരം
തിരുവിതാംകൂറിൽ ദിവാൻ സി.പി. രാമസ്വാമി അയ്യർ നിരോധിച്ചിരുന്നു.
പിന്നീട് അദ്ദേഹം രാഷ്ട്രീയം പൂർണ്ണമായും ഉപേക്ഷിച്ച്
സാഹിത്യ സാംസ്കാരിക പ്രവർത്തകനായി.
മലയാള ചലച്ചിത്ര ഗാനശാഖയിൽ സംസ്കൃതാതിപ്രസരവും,
മറ്റുഭാഷകളിലെ ഗാനങ്ങളുടെ തത്സമങ്ങളും
വിളങ്ങിനിന്നിരുന്ന കാലത്ത്, ഒരു ലളിത ഗാന ശൈലി
ഉണ്ടാക്കിയത് ഭാസ്കരൻ മാസ്റ്റർ ആണ്.
അപൂർവ്വസഹോദരർകൾ എന്ന ചിത്രത്തിലെ ഗാനത്തിൽ
ഏതാനും മലയാളം വരികളാണ് അദ്ദേഹം എഴുതിയ ആദ്യ ചലച്ചിത്ര ഗാനം. മലയാളത്തിൽ ചന്ദ്രിക എന്ന ചിത്രത്തിനാണ് ആദ്യം പാട്ടെഴുതിയത്.
നീലക്കുയിൽ എന്ന ചിത്രത്തിലെ ഗാനങ്ങളോടെ
പി. ഭാസ്കരൻ മലയാള ചലച്ചിത്രത്തിന്റെ അനിവാര്യ ഘടകമായി. രാഷ്ട്രപതിയുടെ രജതകമലം നേടിയ ഈ ചിത്രം
രാമു കാര്യാട്ടും ഭാസ്കരൻ മാസ്റ്ററും ചേർന്ന് സംവിധാനം ചെയ്തതാണ്.
ഇരുട്ടിന്റെ ആത്മാവ്, ജഗത്ഗുരു ആദിശങ്കരാചാര്യർ, കള്ളിച്ചെല്ലമ്മ
തുടങ്ങി 47 ചിത്രങ്ങൾ സംവിധാനം ചെയ്തു.
ഏഴു ചിത്രങ്ങൾ നിർമ്മിച്ചിരുന്നു. ചലച്ചിത്ര രംഗത്തെ
സമഗ്ര സംഭാവനക്ക് ജെ.സി. ദാനിയേൽ പുരസ്കാരം ലഭിച്ചിട്ടുണ്ട്.
അല്ലിയാമ്പൽ കടവിലന്നരക്കു വെള്ളം.., കദളി വാഴക്കൈയിലിരുന്ന്.., മാമലകൾക്കപ്പുറത്ത്.., പുലർകാല സുന്ദര സ്വപ്നത്തിൽ..
തുടങ്ങി ഒട്ടനവധി പ്രസിദ്ധ ഗാനങ്ങൾ പി. ഭാസ്കരന്റേതായിട്ടുണ്ട്.
ഓർക്കുക വല്ലപ്പോഴും, ഒറ്റക്കമ്പിയുള്ള തമ്പുരു, വയലാർ ഗർജ്ജിക്കുന്നു, ഒസ്യത്ത്, പാടും മൺ‌തരികൾ തുടങ്ങിയവയാണ് പ്രധാന കൃതികൾ.
ഒറ്റക്കമ്പിയുള്ള തമ്പുരു എന്ന കൃതിക്ക് 1981-ൽ
ഓടക്കുഴൽ പുരസ്കാരവും, 82-ൽ കേരള സാഹിത്യ അക്കാദമി
പുരസ്കാരവും ലഭിച്ചു. കേരള സാഹിത്യ അക്കാദമിയുടെ
ഫെലോഷിപ്പും ലഭിച്ചിട്ടുണ്ട്. 2000 ൽ വള്ളത്തോൾ അവാർഡും ലഭിച്ചു.
കവിയായി തുടങ്ങിയ ഭാസ്കരന്‍ 50 കളില്‍
ചലച്ചിത്ര ഗാന രചയിതാവായി മാറുകയായിരുന്നു.
വാര്‍ദ്ധക്യത്തിലും ഇദ്ദേഹത്തിന്‍റെ കാവ്യകലയുടെ നീരുറവ വറ്റിയിട്ടില്ല.
വാർദ്ധക്യസഹജമായ അസുഖങ്ങൾമൂലം
2007 ഫെബ്രുവരി 25 ഉച്ചക്ക് 1:10-നു അന്തരിച്ചു.
