മറഡോണ

ഇരുപതാം നൂറ്റാണ്ടിലെ മികച്ച ഫുട്ബോൾ കളിക്കാരൻ
എന്ന ഫിഫയുടെ ബഹുമതി പെലെക്കൊപ്പം
പങ്കുവെക്കുന്ന ഇതിഹാസ താരം ഡീഗോ മരഡോണക്ക്
ഇന്ന് അന്‍പത്തിരണ്ടാം പിറന്നാള്‍....

ബ്യൂണസ് അയേഴ്സിന്റെ തെക്കൻ പ്രാന്തപ്രദേശത്തെ
ചേരിയിൽ ഒരു ദരിദ്രകുടുംബത്തിലായിരുന്നു
1960 ഒക്ടോബർ 30 ന് മറഡോണ ജനിച്ചത്.
പത്താം വയസിൽ തദ്ദേശീയ ക്ലബായ
എസ്ട്രെല്ല റോജാക്ക് വേണ്ടി കളിക്കുമ്പോൾത്തന്നെ
തന്റെ പ്രകടനങ്ങൾ കൊണ്ട് മറഡോണ അർജന്റീനയിലെ
ഒന്നാം ഡിവിഷൻ കളികളുടെ ഇടവേളകളിലെ പന്തടക്ക
പ്രകടനങ്ങൾ മറഡോണക്ക് മാദ്ധ്യമശ്രദ്ധ നൽകി.

16 വയസാവുന്നതിനു മുമ്പെ (10 ദിവസം മുമ്പെ)
അർജന്റിനോസ് ജൂനിയഴ്സിനു വേണ്ടി ഒന്നാം
ഡിവിഷണിൽ കളിക്കാനാരംഭിച്ചു. അർജന്റീന
പ്രൊഫഷണൽ ലീഗിൽ കളിക്കാനിറങ്ങുന്ന ഏറ്റവും
പ്രായം കുറഞ്ഞ കളിക്കാരൻ മറഡോണയായിരുന്നു.
2003 വരെ ഈ റെക്കോഡ് മറഡോണയുടെ
പേരിലായിരുന്നു. 1976 മുതൽ 1980 വരെയുള്ള
കാലയളവിൽ അർജന്റീനോസ് ജൂനിയേഴ്സിനു
വേണ്ടി കളിച്ച മറഡോണ 1981-ൽ ബൊകാ
ജൂനിയേഴ്സിലേക്ക് മാറി. പത്തു ലക്ഷം പൗണ്ടായിരുന്നു കൈമാറ്റത്തുക.

1982-ലെ ലോകകപ്പിനു ശേഷം, യൂറോപ്പിലെ
പ്രശസ്തമായ ഫുട്ബോൾ ക്ലബ്ബായ ബാഴ്സലോണ
മറഡോണയെ സ്വന്തമാക്കി. കൈമാറ്റത്തുകയായിരുന്ന
അമ്പത് ലക്ഷം പൗണ്ട്, അന്നത്തെ ലോക
റെക്കോഡായിരുന്നു. ബാഴ്സലോണ ടീം
മേധാവികളുമായി, പ്രത്യേകിച്ച് ക്ലബ് അദ്ധ്യക്ഷൻ
ജോസെപ് ല്യൂയിസ് ന്യൂനെസുമായുള്ള തുടർച്ചയായ
വിവാദങ്ങളെയും തുടർന്ന് 1984-ൽ മറഡോണ
ബാഴ്സലോണ വിട്ട് ഇറ്റലിയിലെ നാപ്പോളി
ക്ലബിലേക്ക് ചേക്കേറി. ഇത്തവണത്തെ
കൈമാറ്റത്തുകയായിരുന്ന 69 ലക്ഷം പൗണ്ടും
മറ്റൊരു റെക്കോഡായിരുന്നു.

1984 മുതൽ 1991 വരെ മറഡോണ നാപ്പോളിക്കു വേണ്ടി
കളിക്കുകയും ഒട്ടേറെ കിരീടവിജയങ്ങളിൽ
പങ്കാളിയാകുകയും ചെയ്തു. ഇക്കാലയളവാണ്
മറഡോണയുടെ ഫുട്ബോൾജീവിതത്തിന്റെ
സുവർണ്ണകാലമായി കണക്കാക്കപ്പെടുന്നത്.

1982 മുതൽ 1994 വരെയുള്ള നാല് ലോകകപ്പുകളിൽ
അർജന്റീനക്കു വേണ്ടി മറഡോണ കളിച്ചിട്ടുണ്ട്.
ദേശീയ ടീമിൽ അംഗമായിരുന്നിട്ടും പരിചയക്കുറവെന്ന
കാരണത്താ‍ൽ മറഡോണയ്ക്ക്‌ 1978 ലോകകപ്പ്
സംഘത്തിൽ ഇടം കിട്ടിയില്ല. 1982-ൽ ലോകകപ്പിൽ
അരങ്ങേറ്റം. ഈ ലോകകപ്പിന്റെ രണ്ടാം ഘട്ടത്തിൽ
ഇറ്റലിയോടും ബ്രസീലിനോടും തോറ്റ് അർജന്റീന
പുറത്തായി. ബ്രസീലിന്റെ കളിക്കാരൻ ജോവോ
ബാറ്റിസ്റ്റാ ഡസിൽവയെ ചവിട്ടിവീഴ്ത്തിയതിന് മറഡോണ ചുവപ്പുകാർഡ് കണ്ട് പുറത്താകുകയും ചെയ്തു.
അർജന്റീനയുടെയും മറഡോണയുടേയും ഏറ്റവും
മോശപ്പെട്ട ലോകകപ്പ് പ്രകടനങ്ങളിലൊന്നായിരുന്നു ഇത്.

1986-ലെ ലോകകപ്പാണ് ഏറ്റവും
അവിസ്മരണീയമാക്കിയത്. മറഡോണയുടെ
നായകത്വത്തിൽ കളിച്ച അർജന്റീന ടീം ഫൈനലിൽ
പശ്ചിമജർമ്മനിയെ പരാജയപ്പെടുത്തി ഈ ലോകകപ്പ്
നേടുകയും മികച്ച കളിക്കാരനുള്ള ഗോൾഡൻ
ബോൾ മറഡോണ സ്വന്തമാക്കുകയും ചെയ്തു.
ഈ ടൂർണമെന്റിലെ ക്വാർട്ടർ ഫൈനലിൽ
ഇംഗ്ലണ്ടിനെതിരെയുള്ള കളിയിൽ മറഡോണ നേടിയ
രണ്ടു ഗോളുകൾ ചരിത്രത്തിലിടംപിടിച്ചു. റഫറിയുടെ ശ്രദ്ധയിൽപ്പെടാതെ കൈ കൊണ്ട് തട്ടിയിട്ട് നേടിയ
ആദ്യത്തെ ഗോൾ ദൈവത്തിന്റെ കൈ എന്ന പേരിലും,
ആറ് ഇംഗ്ലണ്ട് കളിക്കാരെ വെട്ടിച്ച് 60 മീറ്റർ ഓടി നേടിയ
രണ്ടാം ഗോൾ നൂറ്റാണ്ടിന്റെ ഗോൾ ആയും
വിശേഷിപ്പിക്കപ്പെടുന്നു. കളിയിൽ ഒന്നിനെതിരെ
രണ്ടു ഗോളുകൾക്ക് അർജന്റീന ഇംഗ്ലണ്ടിന്റെ
തോൽപ്പിച്ചു.

1990-ലെ ഇറ്റലി ലോകകപ്പിൽ മറഡോണയുടെ നേതൃത്വത്തിൽത്തന്നെയായിരുന്നു അർജന്റീന
കളിക്കിറങ്ങിയത്. ചാമ്പ്യന്മാരായ അർജന്റീനയെ
ആദ്യ മത്സരത്തിൽ കാമറൂൺ അട്ടിമറിച്ചു.
കഷ്ടിച്ച് രണ്ടാം ഘട്ടത്തിൽ കടന്ന അർജന്റീന
ഫൈനൽ വരെയെത്തിയെങ്കിലും ഫൈനലിൽ
പശ്ചിമജർമ്മനിയോട് തോറ്റ് രണ്ടാം സ്ഥാനം കൊണ്ട് തൃപ്തിപ്പെടേണ്ടീവന്നു.

1994-ലെ അമേരിക്ക ലോകകപ്പിൽ രണ്ടു കളികളിൽ
മാത്രമേ മറഡോണ കളിച്ചുള്ളൂ. ഗ്രീസുമായുള്ള ഒരു
കളിയിൽ ഗോളടീക്കുകയും ചെയ്തു. ഈ
ലോകകപ്പിനിടക്ക് നടത്തിയ ഒരു ഉത്തേജകമരുന്നു
പരിശോധനയിൽ പിടിക്കപ്പെട്ട് തുടർന്നുള്ള മൽസരങ്ങളിൽ
നിന്നും വിലക്കപ്പെട്ടു.

ലോകകപ്പുകളിലും, ക്ലബ് ഫുട്ബോളിലും രാജ്യാന്തര
ഫുട്ബോളിലും നടത്തിയ മികവാർന്ന പ്രകടനങ്ങളെക്കാൾ സംഭവബഹുലമായിരുന്നു മറഡോണയുടെ പൊതുജീവിതം. മയക്കുമരുന്നുപയോഗം, വിവാഹേതരബന്ധങ്ങൾ
എന്നിങ്ങനെ ഒട്ടേറെ സംഭവങ്ങളിലൂടെ അദ്ദേഹം
കുപ്രസിദ്ധി നേടി. 1991 മാർച്ച് 17-ന് ഒരു ഫുട്ബോൾ
മൽസരത്തിനു ശേഷമുള്ള പരിശോധനയിൽ
മറഡോണ, മയക്കുമരുന്ന് (കൊക്കെയ്ൻ)
ഉപയോഗിച്ചതായി കണ്ടെത്തി. ഇതിനെത്തുടർന്ന്
15 മാസത്തേക്ക് ഫുട്ബോളിൽ നിന്ന് അദ്ദേഹത്തെ
വിലക്കി.

വിജയപരാജയങ്ങളോ നേടിയ ഗോളുകളുടെ
എണ്ണമോ നോക്കിയിട്ടായിരുന്നില്ല ഫുട്ബോൾ ലോകം
മറഡോണയെ വിലയിരുത്തിയിരുന്നത്. പന്തടക്കത്തിൽ
മറഡോണയെ വെല്ലാൻ ആളുകൾ കുറവാണ്.
എതിരാളികൾ എത്രപേരുണ്ടേങ്കിലും അവരുടെ
ഇടയിലൂടെ നുഴഞ്ഞുകയറാനും കൂട്ടുകാർക്കു
വിദഗ്‌ദ്ധമായി പന്തു കൈമാറാനും, ആ കൈമാറ്റം
അതി സൂക്ഷ്മവും കൃത്യവുമാക്കാനും
മറഡോണയ്ക്ക്‌ എന്നും കഴിഞ്ഞിരുന്നു.
ഫൗൾ ചെയ്തുകൊണ്ടാണ് പലപ്പോഴും എതിരാളികൾ
ഇദ്ദേഹത്തെ നേരിട്ടിരുന്നത്.